विशाल चौतारी समाचार
चितवन , २०७७ मंसिर १६ मंगलवार ।  चितवनमा झण्डै एक अर्बको लगानीमा पोलिस्याक उद्योग खुल्ने भएको छ । भरतपुर महानगरपालिका वडा नं. १६ शिवघाटस्थित भँगेरीथान नजिक दुई विगाह जमिनमा उद्योग स्थापना गर्न लागिएको हो ।

आशिर्वाद पोलिस्याक इन्डस्ट्रिज नाम दिइएको उद्योगबाट ६ महिना पछि उत्पादन सुरु गर्ने लक्ष्य लिइएको छ । उद्योगले पीपी बोरा, त्रिपाल र फेब्रिक उत्पादन गर्ने उद्योगका अध्यक्ष एवं युवा व्यवसायी विजयबहादुर घलेले जानकारी दिए ।

उद्योगले उत्पादन गरेका ३० प्रतिशत फेब्रिक भारतलगायत खाडीका विभिन्न मुलुकहरूमा निर्यात गर्ने योजना छ ।

उद्योगमा विभिन्न क्षेत्रका १२ जना युवा उद्यमीहरुको लगानी छ । उद्योग सञ्चालनपछि १५० जनाले प्रत्यक्ष रोगजारी पाउने प्रवन्ध निर्देशक गोपाल गौतमले जानकारी दिए । उद्योगका लागि आवश्यक कच्चा पदार्थ भने भारतसहितका तेस्रो मुलुकबाट आयात गरिनेछ ।