रासस । प्रधानमन्त्री कप महिला क्रिकेट प्रतियोगितामा लुम्बिनी प्रदेशले लगातार दोस्रो जित निकालेको छ। हुस्सुका कारण खेल निर्धारित समयमा सुरु हुन नसक्दा १३ ओभरमा छोट्याइएको थियो।

दाङको देउखुरीस्थित लमही क्रिकेट मैदानमा आज भएको खेलमा लुम्बिनीले कर्णाली प्रदेशलाई विकेटले पराजित गर्दै सेमिफाइनल नजिक पुगेको छ। जितका लागि ३५ रनको झिनो लक्ष्य लुम्बिनीले ३ दशमलव १ ओभरमा १ विकेट गुमाउँदै भेट्टायो।

लुम्बिनीकी नेरी थापाले ९, गीता गोसाईले ४ र सरस्वती घर्तीमगरले ३ रन जोडे।

कर्णालीकी अन्जु गुरुङले एक विकेट झारिन्। त्यसअघि टस जितेर पहिला ब्याटिङ गरेको कर्णालीले निर्धारित १३ ओभरमा ६ विकेट गुमाउँदै ३४ रनको योगफल तयार पारेको थियो। दीक्षा पुरीले सर्वाधिक ८ रनको योगदान दिएको खेलमा अंशु शाक्य ७ रनमा अविजित रहिन्।

ओपनर मोनिका राना र तिर्सना विश्वकर्माले समान २ रन जोडे। कप्तान लक्ष्मी रिमाल २ तथा अन्जु गुरुङ १ रन जोडे।

कर्णालीलाई कम स्कोरमा समेट्न लुम्बिनीकी सुस्मिता भुषालले ३ ओभरमा २ मेडन राख्दै १ रन खर्चिन्। कप्तान नेरी थापाले २ तथा सरिता जिसी र गिता गोसाईले समान १ विकेट झारे।

आजै हुने दोस्रो खेलमा विभागीय एपिएफ र प्रदेश २ भिड्दै छन्।