रेड बर्ड प्रोडक्शन र  कस्तुरी प्रोडक्शनको ब्यानरमा नयाँ चलचित्र निर्माणको घोषणा गरिएको छ । निर्माता किरण नेपालीको प्रस्तुतिमा तयार हुन लागेको नयाँ चलचित्रको नाम ‘कल्ली’ राखिएको छ । यो चलचित्रमा लक्ष्मण सुनारको कथा तथा निर्देशन रहनेछ । चलचित्र ‘बुलाकी’ निर्देशन गरेपछि लक्ष्मण चर्चामा छन् । यसैले, उनको निर्देशनमा बन्ने यो चलचित्र पनि केही फरक र विशेष हुने अपेक्षा गर्न सकिन्छ । चलचित्रमा महेश दवाडीको पटकथा तथा संवाद छ । चलचित्रका निर्माण प्रमुख सुरज आचार्य हुन् ।

यो चलचित्रको मुख्य भूमिकामा नायक पल शाह र नायिका बेनिशा हमालले काम गर्ने पक्का भएको छ । चलचित्रको छायांकन अगावै निर्माणपक्षले पल र बेनिशाको गेटअप समेत सार्वजनिक गरेको छ ।
सार्वजनिक तीन पोस्टरमा पल शाह एङ्ग्री अवतारमा देखिएका छन् भने बेनिशाको अवतार केही भिन्न छ । हातमा अग्नी बोकेकी बेनिशाको गेटअपले दर्शकलाई केही फरक अनुभुती हुने निश्चित छ । एउटा पोष्टरमा बेनिशाको आँखाबाट आँशु झरेको देख्न सकिन्छ ।

नायक पल शाह र नायिका बेनिशा हमालले पहिलो पटक एकसाथ पर्दामा काम गर्न लागेका हुन् । चलचित्रको प्रदर्शन मिति समेत घोषणा गरिएको छ । यो चलचित्रलाई नयाँ बर्षको छेको पारेर चैत्रको २९ गतेबाट रिलिज गर्ने घोषणा निर्माणपक्षले गरेको छ ।
सार्वजनिक तीन पोस्टरबाट पल र बेनिशाले यसअघि काम नगरेको भूमिकामा काम गर्दैछन् भन्ने प्रष्ट हुन्छ ।चलचित्रको पोष्टरलाई राकेश दाहालले तयार पारेका हुन् ।
यो चलचित्रको छायांकन कर्णाली प्रदेशका विभिन्न रमणीय स्थानमा गर्ने तयारी भइरहेको निर्देशक सुनारले जानकारी दिए । तिहारपछि चलचित्रको छायांकन सुरु हुनेछ ।