बिशाल चौतारी समाचार
काठमाडौं, २०८१ माघ १६ बुधवार। अभिनेता दयाहाङ राई र अभिनेत्री आँचल शर्मा स्टारर फिल्म ‘दुखी आत्मा’का पहिलो गीत ‘जुनी जुनी भरिलाई’ सार्वजनिक गरिएको छ । केतन क्षेत्री र मुना ठटालको स्वर, इश्वर कार्कीको शब्द तथा संगीतमा तयार भएको छ ।

सार्वजनिक गीत रोमान्टिक शैलीमा तयार पारिएको छ । फिल्मका मुख्य कलाकार दयाहाङ र आँचललाई भिडियोमा फिचर्ड गरिएको छ । भक्तपुर दरबार स्क्वायरमा खिचिएको भिडियोलाई रामजी लामिछानेले नृत्य निर्देशन गरेका हुन् । आलोक शुक्लाको छायांकन रहेको गीतको भिडियोमा रामप्रसाद चौधरीको सम्पादन छ ।
फिल्मको टिजर र ‘ब्रेकअप’ कविता चर्चित भइसकेको छ । सामाजिक संजालमा ब्रेकअप कवितामा टिकटक भिडियो बनाउनेहरूको संख्या लाखभन्दा माथि छ । अब, यो गीतले पनि दर्शकको ध्यान तान्ने आशा गरिएको छ । टिजर सार्वजनिक भएसँगै ‘जुनार’ खुबै हिट छ । कोरियोग्राफरले यो गीतमा जुनारको भरपुर प्रयोग गरेका छन् । दीपेन्द्र लामाको लेखन तथा निर्देशनमा तयार भएको फिल्ममा हिमाल कडरियाको लगानी छ । सुदिप ढकाल कार्यकारी निर्माता रहेको फिल्ममा निमेष श्रेष्ठको सम्पादन छ ।
यो फिल्ममा अनुपविक्रम शाही, बुद्धि तामाङ, रेयर राई, पुष्कर गुरुङ, कविता आले, आरती आचार्य, लोकेन्द्र लेखक, आशान्त शर्मा, दिया मास्के, लुनिभा तुलाधर लगायतका कलाकारको अभिनय छ । क्लक वर्क क्रियसनको व्यानरमा निर्माण भएको फिल्मले यौनमा कमजोर रहेको एक पुरुषको कथा भन्छ । फिल्मले रमाइलो तरिकाले गम्भिर विषयवस्तु उठान गरेको निर्माणपक्षको भनाई छ ।