बिशाल चौतारी समाचार
काठमाडौं, २०८१ चैत्र १२ मंगलवार । चलचित्र निर्माण कम्पनि अनन्या फिल्मस् प्रालीले मल्टिस्टारर चलचित्र ‘जेरी अन टप’को छायांकन सम्पन्न गरेको छ । सोमबार हिमालपारीको जिल्ला मुस्ताङमा चलचित्रको छायांकन सम्पन्न गरेर कलाकार सहितको निर्माण टिम काठमाडौं रिटर्न भएको छ । यो चलचित्रमा स्टार अभिनेता अनमोल केसी अभिनेत्रीद्वय आँचल शर्मा र जसिता गुरुङ, चर्चीत हाँस्य अभिनेता केदार घिमिरे ‘माग्नेबुढा’ प्रमुख अभिनयमा छन् ।

चलचित्रमा समावेश हुने दुई गीत बाहेकका सम्पूर्ण दृश्य छायांकन सकेर फर्केका छौं, निर्माता सरोज न्यौपानेले भने, ‘उत्कृष्ट चलचित्र तयार हुनको लागि आवश्यक कुनै पक्षमा सम्झौता गरिएको छैन् ।’ सगरमाथा बेसक्याम्प, काठमाडौं, मुस्ताङ लगायतका ठाउँमा यो चलचित्र खिचिएको छ । फिल्मका केहि दृश्य काठमाडौंमा झण्डै एक करोडको लागतमा तयार गरिएको सेटमा छायांकन गरिएको थियो ।

अभिनेता भुवन केसी, अभिनेत्री सुरक्षा पन्त र उषा खड्की पनि यो चलचित्रमा प्रमुख अभिनयमा छन् । अनमोल पिता अभिनेता भुवन केसीले ‘जेरी अन टप’मा पनि अनमोलको बुवाकै भुमिका निभाएका छन् । बाल कलाकार हुँदै कलाकारितामा प्रवेश गरेका अनमोलले ‘स्टार’को ट्याग पाइसक्दा अनमोल र भुवनलाई एकसाथ स्कृनमा देख्न आतुर दर्शकलाई यो चलचित्र उपयुक्त अबसर बन्नेमा निर्माण टिम विश्वस्त छ ।

कलाकारको लाइनअपदेखि छायांकनसम्म पुग्दा चलचित्रको बजेट झण्डै ६ करोड पुगेको निर्माता न्यौपानेले बताए । गत सातामात्रै यो चलचित्रको अन्तर्राष्ट्रिय वितरण तथा प्रदर्शन अधिकार बिक्री भएको थियो । हङकङमा स्थापना भएको एलजी एसोसिएट्सले ३ करोड बढि एमजी (मिनिमम ग्यारेन्टी) मा ‘जेरी अन टप’को विदेश राइट्स खरिद गरेको बताइएको छ । यद्यपि रकम भने दुबै पक्षले खुलाएका छैनन् । न्यौपानेले विदेश प्रदर्शन अधिकार बिक्री हुँदा चलचित्रको आधा लगानी ‘कभर’ भइसकेको बताए ।

सुयोग गुरुङको निर्देशनमा तयार यो चलचित्रको प्रदर्शन मिति तय भइसकेको छैन । वितरण कम्पनिसँगको सल्लाहमा केहि दिनमै चलचित्रको प्रदर्शन मिति सार्वजनिक गरिने निर्माता न्यौपानेले बताए । चलचित्रमा समावेश हुने एक गीत नेपालमा र एक गीत भारतका छायांकन गरिने निर्माण टिमले बताएको छ ।