बिशाल चौतारी समाचार
काठमाडौं,  २०८१ चैत्र १८ सोमवार। नायक राजेश हमालले स्वर भरेसँगै चलचित्र ‘नरसिंहाः अवतार’को डबिङ सकिएको छ । चलचित्रका निर्देशक दिवाकर भट्टराइले अन्य सबै कलाकारहरुको पनि डबिङ सकिएको बताए । अबको केही दिनमा चलचित्र तयार हुने उनको भनाई छ ।
डबिङमा राजेश हमालले बोले–‘के तपाई मलाई वेवकुफ संझिनिहुन्छ या साच्चिकै पागल ।’ डबिङ सकिएपछि हमाल चलचित्रलाई लिएर निकै नै आशावादी र उत्साहित देखिए । ‘दर्शकले मलाई यसपटक फरक अवतारमा देख्नुहुनेछ, दर्शकका लागि यो फिल्म सरप्राइज हुनेछ’, हमालले भने ।
चलचित्रको प्रदर्शन मिति सहितको फस्टलुक भोलि सार्वजनिक गर्ने तयारी निर्माताको छ । यो फिल्ममा राजेश हमालको साथमा सरोज खनाल, राज कटुवाल, नीति शाह, सनिषा भट्टराई, उषा खड्गी, अर्जुन श्रेष्ठ, प्रशान्त ताम्राकार, नीर शाह, रमेश चन्द सोडारी, प्रकाश कुँवर, राजिभ जंग बस्नेत, दीपा शाही, प्रभु श्रेष्ठ, अमित गिरी, एभेलिना खड्का, समाइरा थापा, आशा पौडेल लगायतका कलाकारहरुको अभिनय छ ।
राजु विक्रम थापाले खिचेको चलचित्रमा कविराज गहतराज र माइकल चन्दको कोरियोग्राफी, चन्द्र पन्तको एक्सन, मिलन श्रेष्ठ र साहिल खानको सम्पादन, शम्भुजित बास्कोटा र अर्जुन पोखरेलको संगीत छ ।
दिवाकर भट्टराइकै लेखन रहेको चलचित्रमा दीपक शर्मा ढकाल, नरेन्द्र महर्जन र धु्रव न्यौपानेको लगानी छ । चलचित्रमा क्रियटिभ सिने आर्टस्का लागि निर्माता नेम महर्जन रहेका छन् । करण सिंह प्रोडक्सन डिजाइनर रहेको चलचित्रका एसोसियट निर्देशक वसन्त अधिकारी हुन् । आठ वर्षपछि नायक हमाल यो चलचित्रबाट कमब्याक गर्दैछन् । यसैले, उनको कमव्याक कस्तो होला भने कौतुहलता दर्शकमा छ । हमालले पनि यो चलचित्रलाई महत्वकांक्षी प्रोजेक्टको रुपमा हेरेका छन् ।