बिशाल चौतारी समाचार
काठमाडौं,२०८१ चैत्र २० बुधवार। अमित अग्रहरिको निर्माण र विक्की महर्जनको लेखन तथा निर्देशनमा तयार भएको चलचित्र ‘आउटलः दफा २१९’ अब हिन्दी भाषामा पनि रिलिज हुने भएको छ । फिल्मका निर्माता अग्रहरिले चलचित्र हिन्दी भाषामा डब गरिएको र चाडै नै रिलिज हुने बताए । उनले, चलचित्र हलमा रिलिज हुने वा ओटीटीबाट रिलिज गर्ने भन्ने विषयमा कुराकानी भइरहेको बताए ।

चलचित्रको हिन्दी भर्सनमा ‘केजीएफ’ जस्तो चर्चित दक्षिण भारतीय चलचित्रमा आवाज दिने कलाकारहरुले स्वर भरेका छन् । चलचित्रको हिन्दी ट्रेलरमा दर्शकको उत्कृष्ट प्रतिक्रिया आइरहेको छ ।
चलचित्रमा सुशील श्रेष्ठ, शिक्षा संग्रौला, नरेश पौडेल, सुमन भण्डारी लगायतका कलाकारहरुको अभिनय छ । यो चलचित्रले नेपाली दर्शकहरुमाझ पनि राम्रो छाप छाडेको थियो । अझै पनि हलमा चलिरहेको यो चलचित्रको एक्सन पाटोलाई दर्शकले उत्कृष्ट प्रतिक्रिया दिएका थिए ।

नेपालमा राम्रो प्रतिक्रिया पाएपछि विदेशी बजारमा पनि यो चलचित्रको माग राम्रो देखिएको छ । चलचित्र यूरोप, बेलायत, अष्ट्रेलिया, अमेरिका, जापान, कतार, दुबई लगायतका देशमा रिलिज हुँदैछ ।
साहिल खानको सम्पादन रहेको यो चलचित्रमा चुल्ठे काजीको एक्सन, नविन गुरुङको डीओपी छ ।