बिशाल चौतारी समाचार
काठमाडौं,२०८१ चैत्र २२ शुक्रवार। गत असोज ३ गते संविधान दिवसको अवसरमा प्रदर्शनमा आएको यसवर्षको हिट चलचित्र ‘खुस्मा’ निर्माण टिमले नयाँ चलचित्रको घाषणा गरेको छ । अशोक थापा मगरले निर्देशन गर्ने चलचित्रको नाम ‘जलाकी’ राखिएको छ । शुक्रबार चलचित्रको टाइटल मोसन पोस्टर सार्वजनिक गर्दै चलचित्रको निर्माण घोषणा गरिएको हो ।

पोखराको बिन्ध्याबासिनी मन्दिरमा शुभ मुहूर्त गरिएको चलचित्रको छायांकन शुक्रबार आज बागलुङको कालिका भगवती मन्दिरमा भैइरहेको छ । त्रिकोणात्मक प्रेम कथामा आधारित यो चलचित्रमा ‘शाम्बाला’ फेम्ड अभिनेता सोनाम तोप्देन, उपासना सिह ठकुरी, अस्तित्व भट्टचन र आकृति राजभण्डारीको मुख्य भुमिका रहेका छ । गायक सुशान्त केसीको चर्चित गीत बार्दलीबाट उदाएकी मोडल आकृति राजभण्डारीको ‘जलाकी’ डेव्यु चलचित्र रहेको छ ।

कसैको सम्झना र मायाको प्रतिकको रुपमा मानिने ‘जलाकी’ मगर समुदायको आस्थाको प्रतिक ढुंगाले चिनेको स्तम्भलाई बुझाउँछ । यो चलचित्रको छायांकन तिन चरणमा निर्देशक अशोक थापा मगरले बताए । रुकुम, म्याग्दी, बाग्लुङ, पोखराका विभिन्न भुभाग र दक्षिण कोरियामा समेत छायांकन गरिने यो चलचित्रले मगर र गुरुङ समुदायको संस्कृतीलाई झल्काउने छ ।

एम मिडिया प्रालीको व्यानरमा निर्माण हुन लागेको चलचित्रका निर्मातामा ओम घर्तीमगर, वीर बहादुर लामा, चन्द्र बहादुर भट्टचन, बेताने मगर (बबिता राना) मान बहादुर धनाह मगर र सुस्मिता बुढाथोकी रहेका छन् । चलचित्रमा माओत्से गुरुङ, बुद्धि तामाङ, संगीता थापा मगर, राजु रेग्मी मगर, खड्क बहादुर पुन (खबपु) लगायतका कलाकारको पनि अभिनय रहनेछ । अन्य केही कलाकारको छनोट कार्य भैइरहेको निर्माण टिमले जानकारी दिएको छ ।

चलचित्रको शैलेन्द्र डी काकीको डिओपी, राजु रेग्मी मगर लाइन प्रोड्युुसर, महेश बराल मुख्य सहायक निर्देशक, एसडी योगी र सरित राईको संगीत, सुरेन्द्र राना र राम अविरल विष्टको गीत रचना रहनेछ । निर्देशक अशोक थापा मगरले बनाएको चलचित्र ‘खुस्मा’को गीत ‘रुकुम मैकोट’ले युटुबमा पाँच महिनामा दश करोड भ्युज पाउने पहिलो ऐतिहासिक रेकर्ड राख्न समेत सफल भएको थियो ।