मुम्बई, २०७१, जेठ ८ विहिवार । पछिल्लो समयमा हलिउड चलचित्रलाई समेत टक्कर दिने बलिउड चलचित्र उद्योगकका कलाकारहरु धनको मामिलामापनि हलिउड कलाकारहरु भन्दा कम छैनन् । बलिउडका चलचित्र उद्योगमा बादशाह, किङखान तथा अन्य धेरै उपनामले चिनिने अभिनेता शाहरुख खान विश्वकै दोस्रो धनी कलाकार बनेका छन् । अभिनेता खान करिब ६०० मिलियन डलर बराबर सम्पत्तिको मालिक बन्दै दोस्रो धनी कलाकार बनेका हुन् ।

वेल्थ एक्स पत्रिकाले बलिउड, हलिउड तथा संस्सारभरका कलाकारहरु मिलाएर प्रकाशित गरेको सूचीमा अभिनेता शाहरुख खान दोस्रो नम्बरमा पर्न सफल भएका हुन् । विश्वकै सबैभन्दा धनी कलाकारको सूचीमा नम्बर एकमा भने हलिउडका कमेडियन जेरी सेनफिल्ड रहेका छन् । ६० वर्षीय कलाकारसँग कूल ८२० मिलियन डलर बराबरको सम्पत्ति रहेको बताइएको छ ।

बलिउड अभिनेता शाहरुख खानको यो सम्पतिको कारण हलिउड अभिनेताहरु टम क्रुज, जोनी डेप, टम ह्यांकस्, क्लिन्ट इस्टवुड र एडम स्यान्डलरजस्ता हलिउडका चचिर्त अभिनेताहरु पछि पारेका छन् । 

धनी कलाकारको तेस्रो स्थानमा ४८० मिलियन डलर बराबरको सम्पत्ति सहित अभिनेता टम क्रुज रहेका छन् भने ४५० मिलियन डलर सम्पत्तिसहित जोनी डेप र टाइलर पेरी चौथों स्थानमा रहेका छन् । दुई पटक ओस्कर जितेका टम ह्यांकस् आठौं स्थानमा रहेका छन् । उनीसँग ३९० मिलियन डलर सम्पत्ति रहेको सो पत्रिकाले जनाएको छ । ८४ वर्षीय क्लिन्ट इस्टवुड यस सूचीमा सबैभन्दा बढी उमेर भएका कलाकार हुन् । नवौं स्थानमा रहेका उनीसँग ३७० मिलियन डलर सम्पत्ति रहेको छ । दशौं स्थानमा एडम स्यान्डलर रहेका छन् । उनीसँग ३४० मिलियन डलर सम्पत्ति रहेको छ ।