एजेन्सी – इजिप्ट तथा इंग्लिस क्लब लिभरपुलका स्टार फरवार्ड मोहम्मद सलाहलाई कोरोना भाइरस (कोभिड–१९) संक्रमण पुष्टि भएको छ ।

अन्तर्राष्ट्रिय ड्युटीमा रहेका सलाहको दोस्रो पटकको स्वाव संकलनमा कोरोना पुष्टि भएको इजिप्टियन फुटबल एसोसिएसनले पुष्टि गरेको छ । तर उनको कोरोनाको कुनै लक्षण नरहेको पनि एफएले जनाएको छ ।

कोरोना संक्रमित सलाह अर्काे सातासम्म कायरोमै आइसोलेसनमा रहने छ । अनुमति पाएको अवस्थामा मात्रै उनी लन्डन फर्कन सक्नेछ । आफ्ना भाइको वेडिङ पार्टी दौरान सलाहलाई कोरोना संक्रमण भएको अनुमान गरिएको छ ।

लिभरपुलका यो सिजनको सर्वाधिक गोलकर्ताको सुचीमा शीर्षस्थानमा रहेका सलाहलाई कोरोना पुष्टि भएसँगै लिभरपुल र इजिप्टलाई समेत धक्का लागेको छ । चोटका कारण केही स्टार खेलाडीहरु टोली बाहिर रहँदा सलाहलाई कोरोना पुष्टि भएपछि योर्गेन क्लोपलाई थप समस्या उत्पन्न भएको छ । ले यो सिजन लिभरपुलका लागि ८ गोल गरिसकेका छन् ।

सलाहले लिभरपुलको बाँकी दुई खेल लेस्टर सिटी र च्याम्पियन्स लिगमा एटलान्टाविरुद्धको खेल गुमाउने सम्भावना छ । सलाह कोरोना संक्रमित हुने लिभरपुलका चौथा खेलाडी हुन् । यसअघि कोस्टास सिमिकास, थियागो अलकान्तरा र साडियो मानेलाई कोरोना पुष्टि भएको थियो ।

२२ नोभेम्वरमा लेस्टर सिटीविरुद्ध लिभरपुल आफ्नो पहिलो रोजाईका ७ खेलाडीविनै मैदान उत्रने सम्भावना छ । चोटका कारण भर्जिल भान डाइकले यो सिजन गुमाइसकेका छन् । चोटकै कारण ट्रेन्ट एलेक्सान्डर अर्नाेन्ड र जोय गोमेज पनि टोली बाहिर छन् । अलकान्तरा, एलेक्स अक्सलेड चेम्वरलेन र फाविन्हो पुर्णरुवमा फिट छैनन् ।

यो समाचार इजिप्टको लागि ठुलो चोट हो । इजिप्ट २०२२ को जनवरी र फेब्रुअरीमा हुने अफ्रिका कप अप नेसन्सको छनोट खेल खेलिरहेको छ । टोलीले छनोट हुने लक्ष्य बनाएको छ । इजिप्टले आज राति टोगोसँग खेल्दै छ । त्यसपछि १७ नोभेम्वरमा पनि टोगोसँग खेल्दैछ ।

इजिप्ट समूह ‘जी’ मा दुई खेलबाट २ अंक जोडेर तेस्रो स्थानमा रहेको छ । यो समूहमा कोमोरोस ५ अंक जोडेर शीर्षस्थानमा रहेको छ ।