बिशाल चौतारी समाचार
काठमाडौं, २०८२ बैशाख २ मंगलवार। लेखक पशुपति घिमिरेद्वारा लिखित दुई पुस्तक ‘वाण्डरिङ वर्डस’ र ‘थ्री डाइमेन्सन्स अफ बुद्धिजम’ सार्वजनिक भएको छ । हालै अमेरिकाको रिचमन्ड, भर्जिनियामा सिनेटर स्कायलर टी. भ्यान भाल्केनबर्ग, लेखक घिमिरे, रिचमन्ड, भर्जिनियाका नेपाली समुदायका अध्यक्ष चन्द्र मल्ल, उपाध्यक्ष असीम राजभण्डारी, कोषाध्यक्ष रूकेश पोख्रेल, न्याकका सदस्य घनेन्द्र लामिछाने, समाजसेवी रोशन घिमिरेले पुस्तक लोकार्पण गरे ।
लेखक घिमिरेका अनुसार ‘वाण्डरिङ वर्डस’ १८ यात्रा निबन्धहरूको संग्रह हो । जसले पाठकहरूलाई एसिया, युरोप र उत्तर अमेरिकाका दश विविध देशहरूको यात्रामा लैजान्छ । ‘पुस्तकमा रहेको ‘तीन महादेशका केही तरङ्गहरू’ उपशीर्षकले पाठकलाई लगभग आधा संसारको भूगोलको यात्राको रूपमा वर्णन गराउँछ । यो केवल भौगोलिक अन्वेषण मात्र होइन, यसले इतिहास, परम्पराहरू, भाषाहरू, धर्महरू, संस्कृतिहरू, सभ्यताहरू, कला, र साहित्यको समृद्ध तानाबाना बुनेको छ,’ घिमिरे भन्छन् ।
पुस्तकमा देवकोटा र घिमिरेदेखि सोफोक्लिस, सुकरात, र शेक्सपियरसम्मका प्रसंगहरू छन् । ‘पाठकहरूले मोना लिसाको रहस्यमय मुस्कान भेट्न सक्छन् । ट्याक्सी चालकका पीडा महसुस गर्न सक्छन्’, घिमिरे थप्छन् । ‘वाण्डरिङ वर्डस’ एमाजोनमार्फत विश्वभर उपलब्ध छ ।
नेपालमा करिब एक दशकसम्म लेखनको काम गरेका पत्रकार घिमिरेले सन् २०१३ मा पहिलो पुस्तक ‘बुद्धवादका तीन आयाम’ प्रकाशन गरेपछि यो दोस्रो पुस्तक हो । घिमिरेका अनुसार ‘थ्री डाइमेन्सन्स अफ बुद्धिज्म’ सन् २०१३ को नेपाली प्रकाशन ‘बुद्धवादका तीन आयाम’ को अंग्रेजी अनुवाद हो ।
उनका अनुसार यो पुस्तकले बौद्ध धर्म, दर्शन, इतिहास, र साहित्यमा विस्तृत रूपमा गहिरो अन्वेषण गरेको छ । यसले बुद्ध दर्शन, साहित्य, इतिहास र धर्मको व्यापक अध्ययन प्रस्तुत गरेको छ । जसमा यसको दार्शनिक आधारहरू, ऐतिहासिक पृष्ठभूमि, र एसियाभर बुद्ध धर्मको प्रसार समावेश छ ।
पुस्तकले बुद्ध धर्मको उत्पत्ति र आधारभूत सिद्धान्तहरू, बुद्धको समयभन्दा अघिका दार्शनिककाबारे चर्चा गर्दै चार आर्य सत्यहरू, अष्टाङ्गिक मार्ग, र प्रतीत्य समुत्पादको सिद्धान्तलाई प्रष्ट पारेको छ । त्यस्तै विभिन्न ध्यान विधिहरू, जस्तै समथा, विपश्यना, चार ब्रह्मविहारहरू, दश अनुस्मृतिहरू र आरुप्यको अवधारणा पनि अन्वेषण गरेको छ । ‘थ्री डाइमेन्सन्स अफ बुद्धिजम’ले विभिन्न बौद्ध दार्शनिक विद्यालयहरूको विस्तृत विश्लेषण प्रदान गरेको छ, जसमा वैभाषिक, सौत्रान्तिक, माध्यमिक (शून्यवाद), र योगाचार (विज्ञानवाद) समावेश छन् ।
पुस्तकले महायान बौद्ध धर्मको बोधिसत्व आदर्श र वज्रयान बौद्ध धर्मका शिक्षाहरूमा गहिरो अध्ययन प्रस्तुत गरेको छ।  यसले बौद्ध साहित्य खण्डमा पाली त्रिपिटक र महत्वपूर्ण महायान सूत्रहरू सहित बौद्ध साहित्यको व्यापक सिंहावलोकन पनि प्रस्तुत गरेको छ ।
बौद्ध इतिहास खण्डले बौद्ध धर्मको ऐतिहासिक विकासको विस्तृत विश्लेषण प्रदान गर्दछ, चार प्राथमिक बौद्ध सम्मेलनहरूको अभिलेख प्रस्तुत गर्दै ऐतिहासिक तथ्यहरू मार्फत विभिन्न एसियाली देशहरूमा बौद्ध धर्मको प्रसारको इतिहास र वर्तमान प्रस्तुत गरिएको छ ।
पुस्तकले नालन्दा, वल्लभी, विक्रमशिला, जगदला, र ओदन्तपुरी जस्ता प्रमुख ऐतिहासिक बौद्ध विश्वविद्यालयहरूको बारेमा उल्लेख गरेको छ ।
अतिथि सिनेटर भाल्केनबर्गले यस्ता गहन र विचारोत्तेजक विषयहरूमा पुस्तकहरू प्रकाशित गरेकामा लागि लेखक घिमिरेलाई धन्यवाद दिएका थिए । कार्यक्रममा सिनेटर भ्याकेनवर्गले नेपाली कम्यूनिटी अफ रिचमन्ड, भर्जिनियालाई संस्थाको सक्रियता र योगदानको सम्मान स्वरूप राज्य सरकारका तर्फबाट कदर पत्र प्रदान गरेका थिए ।